30 апрель куни Бишкекнинг Октябрь туман суди Qumtor Gold Company собиқ ташқи бошқарувчиси Тенгиз Болтурукнинг эҳтиёт чорасини ўзгартирди. Бу ҳақда Бишкек шаҳар суди матбуот хизмати хабар берди.
Суд прокурорнинг илтимосини қаноатлантириб, Болтурукни уй қамоғига озод қилди.
Тенгиз Болтурук 2021 йилнинг 17 майида Қирғизистон ҳукумати конда ташқи бошқарувни жорий қилган пайтдан бери “Қумтор”ни бошқариб келади. 2022 йил 24 август куни Вазирлар Маҳкамаси Болтурук “Қумтор” раҳбариятидан четлаштирилгани ҳақида хабар берди.
Болтурук 2022 йил сентябрида ҳибсга олинган, шундан сўнг Бош прокуратура Qumtor Gold Company компанияси ишини текшириш натижаларига кўра учта жиноий иш қўзғатган. Тергов маълумотларига кўра, компания давлатга 1 миллиард сомдан ортиқ зарар етказган. Таъминот бўйича мутахассис Ойша-Гул Фронтбек қизи, молия департаменти директори Риспек Тўқтўғулов ва Qumtor Gold Company ижрочи директори Канат Курмановлар ҳам ҳибсга олинган.
Февраль ойи охирида Болтурук президент Садир Жапаровга мурожаат қилиб, Қумтордаги коррупцияни бартараф эта олмагани учун ундан кечирим сўради. У Канадага жўнаб кетишга тайёр эканини айтди ва президентдан “тўғри қарор” қабул қилишни сўради. Жапаров ўз интервьюсида “Қумтор” иши бўйича гумонланувчилар давлатга етказилган зарарни қоплаши кераклигини, шундан сўнг судлар уй қамоғи тарзидаги эҳтиёт чорасини кўриб чиқиши мумкинлигини айтди.
Март ойи ўрталарида Бош прокурор ўринбосари Умуткан Қўнкубоева “Қумтор” коррупция иши бўйича ҳибсга олинганларга 642 миллион сом тўлангани ҳақида хабар берган эди. Жами зарар 1 миллиард 146 миллион сўмни ташкил этади.
